Opozita shpall fitoren në Malin e Zi! Gjukanoviç kryeson me rezultat të ngushtë mes partive/ Shqiptarët sigurojnë dy deputetë

Pas zgjedhjeve në Malin e Zi janë numëruar më shumë se 82% e votave, me partinë e Milo Gjukanoviç që udhëheq me 29 mandate, por fitorja nuk është e sigurtë, pasi partitë e opozitës së bashku me këtë ndarje mandatesh bëhen shumicë. Koalicioni i partive në qeveri ka vetëm 35 mandate. Opozita në Malin e Zi ka shpallur fitoren.

Partia Boshnjake ka 3 mandate dhe Social Demokratët po ashtu. Bie në sy rritja e koalicionit “Për Ardhmërinë e Malit të Zi” me 27 mandate dhe e të gjelbërve me 4.

Koalicioni “Paqja është kombi ynë” ka 10 mandate.

Koalicioni Shqiptar “Njëzëri” ka marrë 1% ndërsa Lista Shqiptare 1.5 %, duke siguruar 2 mandate.

Edhe partitë shqiptare duket se po ia arrijnë qëllimit të fitojnë 2 deputetë, pasi me rezultatet e deritanishme shqiptarët e Malit të Zi do të kenë dy përfaqësues në parlament.

Mali i Zi ka mbyllur zyrtarisht votimet për zgjedhjet parlamentare. Procesi i votimit ka filluar që në orën 07:00 të mëngjesit dhe përfundoi në 20:00.

Në zgjedhjet e sotme garuan Partia Social Demokrate dhe ajo pro-serbe Fronti Demokratik. Po ashtu edhe partitë shqiptare garuan në dy koalicione. Ka pasur një rritje të konsiderueshme të votuesve në krahasim me vitin 2016.

Mali i Zi ka zhvilluar zgjedhjet parlamentare gjatë ditës së sotme. Siç raportohet për "Report Tv", deri në orën 17:00 ka marrë pjesë 68.4% e popullsisë.

Kjo është një përqindje e lartë krahasuar me zgjedhjet e zhvilluara më parë.

Ndërsa për sa i përket shqiptarëve, sipas të dhënave pranë partive politike deri tani kanë votuar rreth 42%

Nikollë Gega, kandidat për deputet në partinë DPS të Milo Gjukanovic, pasi votoi në zgjedhjet e sotme parlamentare të Malit të Zi dha një intervistë për mediat duke deklaruar se do ishte mirë që partitë shqiptare të kishin garuar në një listë të vetme. Gjithsesi sipas tij shqiptarët do të jenë faktor në qeverinë e re.

"Kurrë pjesmarrja s'ka qenë aq e lartë se sa kaq. Këto zgjedhje parlamentare janë quajtur historike meqënse Mali i Zi beosj se shumë shpejt do ti bashkohet Bashkimit Europian.

Këtu në Tuz dhe Mal të Zi garojnë shumë parti politike. Ka edhe subjekte politike nacionale dhe shqiptare. Si ithtar i politës pro evropiane mir do të ishte që partitë politike shqiptare të dilnin me një listë.

Pavarësisht rezultateve të zgjedhjeve jam mëse i bindur se shqiptarët do të jenë pjesë e rëndësishme e qeverisë së Malit të Zi. Nëse në këto zgjedhje ndodh ajo që nuk pritet, fitojnë partitë pro serbe, atëherë nuk ka shanse që Mali i Zi të anëtarësohet në Bashkimin Europian. Madje do të ishte hapa mrapa për vendin."

Në krahasim me zgjedhjet e 2016, në këto të sotmet në Malin e Zi, vihet re një prezencë më e madhe e votuesve. Mediat malazeze raportojnë se deri në orën 13:00 kanë qenë 14.2 më shumë votues se sa në 2016.

Sipas autoriteve malazeze aktualisht pjesmarrja është në 54.1%, ndërsa koordinatorja e PR e CeMI, Maja Bjeliç, tha se 54.4 përqind e votuesve në rajonin e Podgoricës votuan deri në 1 pasdite, 57.2 përqind në rajonin Jugor dhe 48.6 përqind në rajonin Verior.

"Në zgjedhjet parlamentare të mbajtura në vitin 2016, pjesëmarrja deri në 1 pasdite ishte 39.9%, që është 14.2 përqind më pak se sot. Në zgjedhjet e 2012, pjesëmarrja ishte 33.3 përqind, që është 20.8 përqind më pak se sot,"-tha Bjeliç.

Sipas vëzhguesve të CeMI nga terreni, një numër i madh i qytetarëve janë ende të pranishëm në qendrat e votimit të cilët nuk i ndjekin rekomandimet e PKT për mbajtjen e distancës fizike, veçanërisht kur bëhet fjalë për pritjen në radhë para qendrave zgjedhore.

Kryetari i Lidhjes Demokratike Shqiptare Mal i Zi, Nikoll Camaj numri tre i listës shqiptare në zgjedhjet që po zhvillohen sot shprehet se kurrësesi nuk do të bëjnë koalicion me opozitën proserbe, ndësa synimet e tij janë dy; rritja e investimeve në vendet e banuara nga shqiptarët dhe kthimi i pronave të plaçkitura.

"Është një situatë normale, është një ditë e rëndësishme për shqiptarët, dalja është në numër premtues, shqiptarët që kanë mbështetur Listën Shqiptare dhe pjesa më e mirë e tyre kanë dalë për të realizuar këtë të drejtë.

Presim të dalim me dy deputetë, që të jenë vendimtar në qeverinë e ardhshme dhe të marrim përgjegjësinë në këto zgjedhje. Për shqiptarët në Malin e Zi do të kemi një qasje të re dhe theksi duhet të jenë që vendet e banuara me shqiptarë duhet të zhvillohen dhe të kthehen pronat e plaçkitura.

Shpresojmë që të përsëritet suksesi i zgjedhjeve lokale. Pritëm për një listë të përbashkët, por pala tjetër të lëshojë pe, por ishte kokëfortë, do të ishte benefit për shqiptarët, ne do të ishim unik në zgjidhjen e cështjeve dhe bisedimet për qeverinë e ardhshme.

Nuk do të shkojmë me atë që me retorikën e tyre nuk duan ta pranojnë shqiptarin, opozita proserbe në Mal të Zi nuk ka ndërmend të marrë pushtet prandaj përdor atë retorikë. Në këto zgjedhje edhe kisha është rreshtuar pas bllokut serb, por janë larg për të krijuar një qeveri të ardhshme" tha ai.

Procesi i votimit po vijon normalisht në Mal të Zi, përfshirë edhe Tuzin. Në Malin e Zi, 24 mijë shqiptarë kanë të drejtë vote, teksa në Tuz janë 7 qendra votimi. Në total të drejtë vote në Malin e Zi kanë 540 mijë zgjedhës. Report Tv sjell pamjet nga votimi në Tuz.

Kryetari i Alternativës Shqiptare, kandidat i Listës Shqiptare në Tuz, Nikollë Camaj, votoi në orën 10:00 për zgjdhjet parlamentare që po mbahen sot në Malin e Zi.

Kryetari i Partisë Lidhja Demokratike Shqiptare, pjesë e Listës Shqiptare, menjëherë pas votimit në rrjetet sociale shkroi: "Dilni e shfrytëzoni të drejtën e votës!
Unë këtë të drejtë e realizova në ora 10! Kësaj radhe, vet i pesti, sepse e gjashta nuk ka të drejtë vote; akoma!"

Prej orës 07:00 të mëngjesit në Malin e Zi po zhvillohen zgjedhjet parlamentare. Deri në orën 9:40 raportohet se kanë votuar 14.3% e zgjedhësve. Një rritje e konsiderueshme me vitin 2016 kur pjesmarrja deri në këtë orë ishte 6.5%.

Siç duket koronavirus nuk ka patur ndikim në zgjedhje, të paktën deri më tani.

Kryetari i bashkisë së Tuzit në Malin e Zi, Nik Gjeloshaj, ka votuar në orën 10 në zgjedhjet parlamentare që mbahen sot në këtë vend.

Gjeloshaj është kandidat për deputet në Listën Shqiptare, ndërsa hedhjes së votës në rrjetet sociale shkruan: 

"Të nderuar qytetarë. Unë sapo përfundova obligimin qytetar, andaj Ju ftoj edhe juve të delni në votime!"

Përsa i përket zgjedhjeve pjesmarrja deri në orën tetë ka qenë 6%. Deri më tani asnjë incident nuk është regjistruar.